ހާދަހާ ދެރައޭ ޙަޔާތާ...!
އަހަރެންގެ ނޭވާ ހާސްވަނީ އެވެ. ތަފާތު ފިކުރުތަކުން ހިތްނުތަނަވަސް ކުރުވަނީ އެވެ. އަބަދުވެސް ހުންނަނީ ކަރުހިތްކައިގެންފައެވެ. ކިތަންމެ ވަރަށް ފެންބުޔަކަސް އަލާއެއް ނުކެނޑެއެވެ. ފާޑަކަށް ކުރުގެޅިފައި އިނދެވެނީ އެވެ. މާފުށި ޖަލުގަ ހަދާފަހުރި އަށްފޫޓު އަށްފޫޓު ގެ މި ކުޑަގޮޅި އަކީ އަހަރެންގެ މަރުގެ ތަންމައްޗަށް ވެއްޖެއެވެ. މިއީ އަހަންނަށް އުޅެވުނު ވިޔާނުދާ ދިރިއުޅުމެއްގެ ހިތި ނަތީޖާއެވެ.
--------------------
ބ.އޭދަފުށްޓަށް އަހަރެން ހިޖުރަކުރީ ވަޒީފާއެއް ހޯދުމުގެ ބޭނުމުގައެވެ. އަހަންނަކީ މިއަތޮޅު ދަރަވަންދުއަށް އުފަން ބީރައްޓެއްސަކީމެވެ. އަތޮޅު މަދަރުސާ އިން ގުރޭޑް 10 ނިންމުމަށް ފަހު އަހަރެން އުޅުނީ ތަފާތު މީސްމީހުން ކައިރީ އެކިއެކި މަސައްކަތް ކޮށްދިނުމުގައެވެ. ކިޔެވި އެއްވެސް އެއްޗަކުން ފާސްނުވުމުން އިތުރަށް ކިޔެވޭނެ ފުރުސަތެއް ނުލިބުނެވެ. އަހަންނަށް ލިބޭ މަދު ފައިސާ ކޮޅު އަހަރެން ޙަރަދު ކުރަނީ މުޅިންވެސް ސިނގިރެޓް ބުއިމަށެވެ. ލިބޭ އެއްޗަކުން ދެކޮޅު ނުޖެހޭތީ އަހަރެންގެ ދިރިއުޅުން އޭދަފުއްޓަށް ބަދަލުކުރީ އަހަރެންގެ ރަހުމަތްތެރި އަޔާޒް ގެ އެހީގައެވެ.
އަޔާޒު އަހަންނަށް ވަރަށް ރަނގަޅެވެ. ކޮންމެކަމެއްގައިވެސް އަހަންނަށް އެހީތެރިކަން ފޯރުކޮށްދެއެވެ. އަހަންނަށް ވަޒީފާ އެއް ނުލިބުނު ނަމަވެސް މިރަށާ ޖެހިގެން އޮންނަ ރިސޯޓެއް ކަމަށްވާ ސޮނެވާފުއްޓަށް ދުވާލު މުސާރަޔަށް މަސައްކަތް ކުރަން ދިއުމުގެ ފުރުޞަތު އަޔާޒު އަހަންނަށް ހޯދަދިނެވެ.
މިގޮތުގައި ދުވަސްތައް ހޭދަވަމުން ދިޔައެވެ. އަހަރެން ވެސް އަހަރެންގެ ދިރިއުޅުން އިތުރަށް ފުޅާ ކުރަން ބޭނުންވިއެވެ. މި ރަށުން ވަރަށް ޔަތީމު ނިކަމެތި އަންހެން ކުއްޖަކާ އަހަރެން ކައިވެނި ކުރީމެވެ. ދިޔާނާ އަކީ ވަރަށް ހިތްހެޔޮ މަޑުމައިތިރި މިޒާޖެއްގެ ކުއްޖެކެވެ. މައެއް ބަފައެއްގެ އެހީތެރިކަމަކާ ނުލާ އެކަނި މާއެކަނި ދިރިއުޅެމުން އަންނަ ކުއްޖެކެވެ. އަހަންނަށް ދިޔާނާ ދެއްކީ އަހަރެންގެ އެކުވެރި އަޔާޒެވެ. ރެއާއި ދުވާލު އަހަރެން ދިޔާނާގެ ގޭދޮށުގައި މުގޯލިއަޅަމުން ހިނގީމެވެ. އަހަރެންގެ ލޯބި ގަބޫލުކުރުން އެދި އެތަކެއް ފަހަރު އާދޭސް ކޮށް ހެދީމެވެ. މުޅި އުމުރަށް ވެސް އެކީ އުޅޭނެ ކަމަށް ބުނެ އެތައް ވަޢުދު ތަކެއް ވީމެވެ. އެންމެފަހުން ދިޔާނާ އަހަރެންގެ ޙަޔާތަށް އައުމަށް އެއްބަސްވީ އެވެ.
އަހަރެމެން ނަށް ލިބޭ މަދު މުސާރަ ކޮޅުން ދެމަފިރިންގެ ޙަރަދު ތައް ފޫބެއްދޭ ވަރެއް ނުވެއެވެ. މިހެންވެ އަހަރެމެން ދެމަފިރިންގެ ދޭތެރޭ ތަފާތު މައްސަލަތައް ޖެހެން ފެށިއެވެ.
އަހަރެންވެސް ގަބޫލުކުރަމެވެ. އަހަންނަށް ލިބޭ މުސާރައިގެ ބޮޑުބައެއް އަހަންނަށް ޙަރަދު ކުރެވެނީ ސިނގިރެޓް ބުއިމަށެވެ. އަދި އަހަރެންގެ ރައްޓެހިންނަށް ސިނގިރެޓް ގަނެދިނުމަށެވެ. މިކަމަކީ ދިޔާނާ ވަރަށް ނުރުހޭ ކަމެކެވެ. އެހެންނަމަވެސް އަހަންނަށް ވަނީ ސިނގިރެޓާ ނުލާ ނޫޅެވޭ ވަރުވެފައެވެ. އަހަރެންގެ ތުނބުގަ ސިނގިރެޓެއް ނޯންނަ އިރެއް ވަރަށް މަދުވާނެއެވެ.
އަހަރެން އަހަރެންގެ ޙަޔާތުގެ ވާހަކަތައް ހަމައެކަނި ހިއްސާކުރަނީ އަޔާޒު އާއެވެ. އަހަންނަށް މިހާރު ލިބޭ އެއްޗަކުން ދެކޮޅު ނުޖެހޭ ވާހަކަޔާ އިތުރު މަސައްކަތެއް ކުރަން ބޭނުން ވާ ވާހަކަ އަޔާޒު ކައިރީ ބުނީމެވެ.
"ތީކީ އެއްވެސް ކަމެއް ނޫން! ތިކަން ޙައްލު ކޮށްދީފާނަން!"
ވަރަށް ޔަގީންކަމާ އެކު އަޔާޒު ބުނެލިއެވެ. އަހަރެން އެއީ ކިހިނެއްތޯ ސުވާލުކުރީމެވެ. ޖަވާބުގައި އޭނަބުނީ، އޭނަކުރާ ވިޔަފާރިއެއްގައި އޭނަ އަށް އެހީތެރި ވެދިނުމަށެވެ. އޭރަށް އޭނަޔަށް ލިބޭ އެއްޗެއްގެ ދެބައިކުޅަ އެއްބައި އަހަންނަށް ވެސް ދޭނެ ކަމަށް ބުންޏެވެ.
އަހަރެން އެއީ ކޮން ވިޔަފާރިއެއްތޯ ސުވާލުކުރީމެވެ. އަޔާޒު އަހަރެންގެ އަތުގައި ހިފިއެވެ. އަދި އަހަރެން ގޮވައިގެން ގޮސް އޭނަގެ ކޮޓްރިއަށް ވެއްދިއެވެ. އެއަށް ފަހު ދޮރު ތަޅުލިއެވެ.
" މިއީ ވަރަށްބޮޑު ސިއްރެއް! އެއްވެސް މީހެއްކައިރީ މިވާހަކަ ދައްކައިގެން ނުވާނެ!"
އަހަރެން އެއްވެސް ޝަކުވާއެއް ނެތި އަޔާޒު އާއި އެއްބަސް ވީމެވެ. ކޮންމެ ކަމެއްކުރަންޖެހުނަސް އަހަރެން ފަސްނުޖެހޭނެ ކަމުގައި ބުނީމެވެ.
އަލަމާރި ތެރެއިން ކުޑަފޮށްޓެއް ނަގައިގެން އައިސް އަޔާޒު އަހަރެން ކައިރީ އިށީނެވެ. ވަރަށްރީތިކޮށް ބަންދުކޮށްފަ ހުރި ޕާރުސަލެކެވެ. ހީވަނީ ލޯބިވެރިއަކު ވަރަށް ލޯބިން ގެނެސްދީފަ އޮތް ހަދިޔާއެއް ހެންނެވެ.
އަޔާޒު ވަރަށް ފަރުވާތެރިކަމާ އެކު އެފޮށި ކަނޑާލިއެވެ. އަދި އޭގެތެރެއަށް އަތްބޭނުމަށް ފަހު ކުޑަ ކުޑަ ހަތަރު ޕެކެޓް ނެގިއެވެ. މަޑުމަޑު މުށިކުލައިގެ ކުނޑިތަކެއް އަޅާފަ ހުރި ރަބަރު ޕެކެޓް ތަކެކެވެ. އެ ފެނުމާއި އެކު އަހަންނަށް އެއީ ކޮން އެއްޗެއްކަން އެނގުނެވެ. މީގެ އެއް އަހަރު ކުރިން އަހަރެންވެސް އަހަރެންގެ ރަށުގަ އެ ބޭނުންކުރީމެވެ. އަހަރެންގެ އޭރުގެ އެއް ރަހުމަތްތެރިޔެއް ކަމަށްވާ ހާމިދު އަހަންނަށް އެ ތައާރަފު ކޮށްދިނީ އެއީ "ހަޔާތަށް ދިރުންދޭ ކާނާ" އޭ ބުނަމުންނެވެ.
"ކޮން ޙިޔާލެއްގަ؟"
އަޔާޒު އަހަރެންގެ ގައިގައި ކޮށްޓާލިއެވެ. އަހަރެން އެތަނުން އެއްޕެކެޓް ނެގީމެވެ. އަދި އެ ހުޅުވާލުމަށްފަހު އޭގެން ކުނޑިކޮޅެއް އިނގިލި ކުރިޔަށް ޖައްސާލީމެވެ. އެއަށްފަހު ނޭފަތާ ކައިރިކޮށްލުމަށްފަހު ނޯށުގެ ތެރެއަށް ދަމާލީމެވެ.
" ވާ...އު، ހަންޑްރެޑް ޕަސެންޓް ކޮކެއިން" ފުންނޭވާއެއް ލުމަށް ފަހު ވަރަށް ޔަގީންކަމާއެކު އަހަރެން ބުނެލީމެވެ.
އަޔާޒް ހޭންފެށިއެވެ.
" އަހަރެން ހައިރާނެއް ނުވޭ! އަހަންނަށް ކުރިންވެސް އެނގޭ ޝިހާދު އަށް މީ ކޯންޗެއްކަން އެނގޭނެ ކަން. ޝިހާދުމެން ރަށު ހާމިދު އަކީ އަހަރެންގެ އެޖެންޓެއް"
މިހެން ބުނުމަށް ފަހު އަޔާޒު އަނެއްކާވެސް ހޭންފެށިއެވެ.
ހަވީރުގެ ހިތްގައިމު ވަގުތެވެ. ދިޔާނާ އެކަނި މާ އެކަނި ކޮޓްރީގައި އޮށޯވެ ލައިގެން އޮތެވެ. ޝިހާދު އަންނާނެ ވަގުތެއްގެ އިންތިޒާރު ގައެވެ. އެކަނިވެރިކަން ފަޅުފިލުވާލަދޭނެ ދަރިޔަކު ބޭނުންވާ ވާހަކަ ޝިހާދު ކައިރީ ބުނުމުގެ ފޮނި އިންތިޒާރުގައި އޮއްވައި ކޮންމެވެސް މީހަކު ދޮރުގައި ޓަކިޖެހި އަޑު އިވުނެވެ.
ދިޔާނާ ވީ އުފަލުން ފުންމައިގެން ތެދުވެ ދުވެފަގޮސް ދޮރު ހުޅުވިއެވެ. އެވަގުތު ކުރިމަތީގައި ހުރީ ޝިހާދުގެ އެންމެ އެކުވެރި އަޔާޒެވެ. ދިޔާނާ ވާހަކަ ދައްކަން އަނގަހުޅުވާލިތަނާ އަޔާޒު ދިޔާނާގެ އަނގަމަތީގައި ބާރަށް ހިފެހެއްޓި އެވެ. އަދި ދޮރު ލެއްޕުމަށް ފަހު ތަޅުލިއެވެ.
އިރު އޮއްސި މުޅިރަށް އަނދިރިވެއްޖެއެވެ. ސޮނެވާ ފުށީ ފެރީ ދޯނިން ފައިބައިގެން ގެއާދިމާލަށް ދާން އަހަރެން ހިނގާ ގަތީ ވަރަށް އުފަލުން ހުރެ އެވެ. މިއަދުގެ ވިޔަފާރި ވަރަށް ރަނގަޅުވުމުން ނެވެ. އަޔާޒު ބުނި އަގަށްވުރެން ދެގުނަ ބޮޑުކޮށް މިއަދުގެ "ޑީލް" އަހަރެން ނިންމާލީ މެވެ.
ގެއަށް ނުދެވެނީސް އަޔާޒު ސައިކަލުގަ އައިސް އަހަންނާ ބައްދަލު ކުރި އެވެ. އެއަށް ފަހު އަޔާޒު އާ އެކީ ގޮސްވަނީ ކެފޭ އަކަށެވެ. ކަޅު ކޮފީ އަށް އޯޑަރު ދިނުމަށް ފަހު ސިނގިރެޓެއް ދިއްކޮށްލަމުން އަޔާޒް އަހަންނާ ވާހަކަ ދައްކަން ފެށިއެވެ.
" ކޮބާ ޑީލް ކިހިނެއް؟"
އަހަރެން ހިނިތުން ވެލީމެވެ. އަދި ވަރަށް ކާމިޔާބު ކަމުގައި ބުނަމުން އަހަރެންގެ ވޮލެޓް ނެގީމެވެ. އަދި އަޔާޒު ބުނި އަގަށް ވާ ފައިސާ ނެގުމަށް ފަހު އޭނަގެ އަތަށް ދިއްކޮށްލީމެވެ.
އަޔާޒު އެފައިސާގަ ހިފި އެވެ. އަދި އޭގެން ތިންބައި ކޮށްފަ ދެބައި އަހަރެންގެ އަތަށް ދީފަ މިއީ ބޯނަސް އޭ ބުނެލިއެވެ. އަދި މިރޭ ގެއަށް ދިއުމުގެ ކުރިން އެއް ޑީލް ނިންމާލަން ޖެހޭނެ ކަމަށް ބުންޏެވެ.
އަހަރެން އެއްބަސް ވީމެވެ. އެވަގުތު އަޔާޒް އަހަރެންގެ އަތަށް ސިނގިރެޓް ފޮށްޓެއް ދިއްކޮށްލަމުން " ދިސް އިޒް އިޓް" މިހެން ބުނެލިއެވެ.
ކޮފީ ބޮއެ ނިމުމުން އަހަރެމެން ދިޔައީ ރަށުގެ ބަނދަރުމަތީގައި ހަދާފަ ހުރި ބޮޑު އިސްޓޭޖް ކައިރިއަށެވެ. އެތަނަށް އަހަރެން ބޭލުމަށް ފަހު އަޔާޒް ދިޔައީ ގެއަށެވެ. އަހަރެން އިސްޓޭޖު ފުރަގަހުގައި އަޔާޒު އެތަނަށް އަންނާނެ ކަމަށް ބުނި ކުއްޖެއްގެ އިންތިޒާރުގައި މަޑުކޮށްލައިގެން އިނީމެމެވެ.
ކުއްލިއަކަށް އަހަރެންގެ ހަތަރެސް ފައި ކޮޅަށް ޖެހުނެވެ. އައި ނައި ދިމާލެއް އެނގުމަކާ ނުލާ ފުލުހުން އައިސް އަހަރެން ވަށާލިއެވެ. އަދި އަހަރެން ފާސް ކުރުމަށް ފަހު ޖިޕަށް އަރުވައިގެން އަހަރެން ގެންދިޔަ އެވެ.
ހުރިހިތާމައެއްގެ ބޮޑުކަމާ އެވެ. އަހަރެންގެ މުޅި ހަޔާތް ބަރުބާދު ވީއެވެ. އަހަރެން ފުލުސް އޮފީހަށް ގެންދިއުމަށް ފަހު ސުވާލު ކުރުމަށް ޓަކައި
ގޮނޑީގައި ބޭން ދިއެވެ. އޭރު އަހަރެންގެ އެކުވެރި އަޔާޒުވެސް ފުލުހުންގެ ބެލުމުގެ ދަށަށް ގެންގޮއްސަ އިނެވެ. އެވަގުތު އަޔާޒު އަހަންނާ ދިމާ ލަށް ހަޅޭ ލަވަން ފެށިއެވެ. މިކަން ބަސްޓުވީ އަހަރެން ފަރުވާ ކުޑަކަމުންނޭ ބުނެ އަޑުގަދަ ކުރި އެވެ. އެވަގުތު ފުލުހުންގެ އިންޗާރޖު އައިމަން މަންސޫރު އައިސް އަޔާޒުގެ އަނގަމަތީގަ ހިފެހެއްޓިއެވެ. އަދި އިތުރަށް އެންމެ ބަހެއްވެސް ނުބުނެ މަޑުން އިނުމަށް އިންޒާރު ދިނެވެ.
ކުއްލިއަކަށް އަހަރެން އަންހެނުންގެ މަތިން ހަނދާން ވިއެވެ. މިތަނުން ދެން ސަލާމަތް ނުވާނެ ކަން ޔަގީން ވުމުން އެންމެ ފަހަރަކު ނަމަވެސް ދިޔާނާއާ ވާހަކަ ދައްކާލަން ބޭނުންވިއެވެ. ނަމަވެސް ފުލުހުން އަހަންނަށް އެ ފުރުސަތު ދޭން އިންކާރު ކުރި އެވެ. ތަކުރާރު ކޮށް އާދޭސް ކުރަން ފެށުމުން ފުލުސް އޮފީހުގެ ފޯނުން ލައުޑް ސްޕީކަރަށް ލުމަށް ފަހު ދިޔާނާ އަށް ގުޅިއެވެ. ދިޔާނާ ފޯނު ނެގުމާއި އެކު ފުރަތަމަ ވާހަކަ ދެއްކީ ފުލުހުންގެ އިންޗާޖެވެ. ދިޔާނާގެ ފިރިމީހާ މަސްތުވާ ތަކެތީގެ ސާބިތު މައްސަލައެއްގައި ހަތްޔަރު ކުރެވެއްޖެ ކަމަށާ، ޝިހާދު ކައިރީ ބުނެލަން ބޭނުން ވާހަކައެއް އޮތްނަމަ އަވަހަށް ބުނުމަށް އެދުނެވެ.
އެވަގުތު ދިޔާނާ އަޑުން އަޑުނަގާ ރޯންފެއްޓިއެވެ. ޝިހާދު ވެސް އަހަންނަށް މާފުކުރާށޭ ބުނެ ރޯންފެށިއެވެ.
" ޝިހާދުގެ އެކުވެރި އަޔާޒު އަކީ ވަރަށް ރަހުމެއް ނެތް އަނިޔާ ވެރިއެއް، އޭނަ މިއަދު އަހަރެންގެ މުޅި އިއްފަތް ތެރިކަން ވެއްޔާ މޮޑެލައިފި...."
ރޮމުން ރޮމުން ދިޔާނާ އެބުނި އެއްޗެއް އަޑުއިވުނީ ހަމަ ކިރިޔާ އެވެ. އަހަންނަށް ފުންމައިގެން ތެދުވެވުނެވެ. ހީވީ ކަންފަތްމަތީ މީހަކު ޖެހި ހެންނެވެ. ހައިވެފައި އޮތް މިނިކާވަގެއް ހެން އަހަންނަށް އަޔާޒުގެ ގައިމައްޗަށް ފުންމާލެވުނެވެ. އަދި ގައިގަ ހުރި ބާރެއްލާފަ އޭނަގެ ކަރުގަ ހިފައި ގަނެވުނެވެ. ފުލުހުން ވަގުތުން އަހަރެން ދުރުކުރުވަން އުޅުނެވެ. ނަމަވެސް އަހަރެންގެ ގަޔަށް ހުރީ އާދަޔާ ހިލާފު ބާރެއް ޖެހިފައެވެ. ފުލުހުންނަށް އަހަރެން ދުރުކުރެވުނު އިރު އަހަރެން ވަނީ ހަބަރު ހުސްވެފައެވެ.
------------------------------
އިރުކޮޅަކުން ފުލުހުން އައިސް އަހަރެން އޮތް ޖަލުގެ ގޭޓް ހުޅުވިއެވެ. މިއަދު މީ އަހަރެންގެ ހަޔާތުގެ އެންމެ ފަހު ދުވަހެވެ. އަހަރެންނަށް މަރުގެ ހުކުމް އިއްވޭ ދުވަހެވެ. އަހަރެންގެ ހަޔާތް މި ނިމިގެން ދަނީ ކޮންފަދަ ހިތި ގޮތަކަށް ހެއްޔެވެ. ހަޔާތަށް ދިރުން ދޭ ކާނާ އެއް ގެ ގޮތުގަ ބަލައިގަތް މަސްތުވާތަކެތި އެންމެފަހުންމިވީ އަހަރެންގެ ހަޔާތަށް ނިމުން ގެނުވަދިން ޒަހަރަކަށެވެ.
=ނިމުނީ=
By: abhal – 16-09-09
