ލޯބިވީމެވެ، ނަމަވެސް...
(ނޯޓް: މިއީ ހަގީގީ ވާހަކަ އެކެވެ. ނަމަވެސް ވާހަކައިގައި ބޭނުންކުރެވިފައި އެވަނީ ހިޔާލީ ނަންތަކެކެވެ.)
އަހަންނަށް އެންމެފުރަތަމަ ހުމެއިދު ފެނުނުދުވަހުން ފެށިގެން އޭނަދެކެ ލޯބިވެވުނެވެ. ބޭއިޙުތިޔާރުގައެއްނޫނެވެ. ހުމެއިދުއަކީ ކާކުކަން އެނގިހުރެ ފުރިހަމަ އިޙުތިޔާރުގައެވެ. ލޯބިވެވުނީ އޭގެ އިންތިހާޔަށެވެ. ސަބަބެއް ނެތިއެއްވެސް ނޫނެވެ. އަހަރެން އެންމެފުރަތަމަ ރައްޓެހިވި ކުއްޖާ އެއްވެސް ސަބަބެއްނެތި އަހަރެން ދޫކޮށްފަ ދިޔުމުން ލިބުނު ހިތާމަތައް ހަނދާން ނައްތާލާ މުޅިން އައު ހަޔާތެއް ފަށަން ބޭނުންވާތީއެވެ. އަހަރެންގެ ޒުވާންއުމުރު ހުސްހަށިބަޔަށް ހުރެ ބޭކާރުކޮށްލަން ބޭނުންނުވާތީއެވެ.
މިއީ އަހަރެންގެ ޑިގްރީ ކޯހުގެ އެންމެ ފަހު އަހަރެވެ. ފާއިތުވި ދެއަހަރެއްހާ ދުވަސް މެލޭސިޔާގައި އަހަރެން މި ހޭދަކުރީ ވަރަށް އެކަނިވެރި، އެހާމެ ހިތްދަތި ދުވަސް ތަކެކެވެ. އަހަންނަށް ހުމެއިދު ފެނުނީ ރައްޓެއްސަކާއި އެކު އެގެއަށް ދިއުމުންނެވެ. އިއްތިފާޤުން ހުމެއިދުގެ އާއިލާ އަކީ އަހަރެންގެ އާއިލާ އާއި ކޮންމެވެސް ވަރަކަށް ތިމާގެ ބައެކެވެ. އެހެން ކަމުން އަހަންނަށް ހުމެއިދު އަކީ ކޮންކަހަލަ ކުއްޖެއްކަން ދަސްކުރުމަކީ ނުހަނު ފަސޭހަކަމަކަށް ވިއެވެ.
އަހަރެންގެ ހިތުގައި ހުމެއިދުގެ ލޯބި ރަސްކަން ކުރަން ފެށިއެވެ. އަހަރެން އަޒުމް ކަނޑައެޅީ މަޑުމަޑުން ހުމެއިދުގެ ލޯބި ކާމިޔާބުކޮށް އަހަރެންގެ މިލްކަކަށް އޭނަ ހެދުމެވެ. މިގޮތުން ކުޑަދުވަސް ކޮޅެއްގެ ތެރޭގައި ހުމޭދުއާއި ގުޅުން ބަދަހިކުރީމެވެ. އެކުވެރިއެއްގެ ގޮތުގައެވެ. އަހަރެންގެ ހިތުގައި ހުމެއިދުއަށް ޙާއްސަ މަގާމެއް ދެވިފައިވާކަން މަޑުމަޑުން ހުމެއިދުއަށް އަންގަދިނީމެވެ. ފާޅުގައި ލޯބިވާކަން ދުލުން ހާމަނުކުރިނަމަވެސް، ދެމީންނަށް ވެސް އެކަކު އަނެކަކުދެކެ ލޯބިވެވި އަހަރެންގެ ހިތުގެ އެދުންތަކަށް ފިނިކަން ލިބެމުން ދިޔައެވެ.
ކޮންމެ ދުވަހަކުވެސް އަހަރެން ހުމެއިދުއަށް އެތައް މެސެޖެއް ފޮނުވަމެވެ. އޭނަގެ ހާލުބަލައި އަހަރެންގެ އިހުސާސް ތައް ހިއްސާ ކުރަމެެވެ. ހުމެއިދު އުޅެނީ އަހަރެން އުޅޭ ސިޓީ އާއި ވަރަށް ދުރު ހިސާބެއްގަ ކަމުން ދެމީހުންނަށް ބައްދަލުވެވެނީ ވަރަށް މަދުންނެވެ. އެހެން ކަމުން ފޯނުގެ އެހީގައި ދެމީން ވެސް އެކަކު އަނެކެއްގެ އިހުސާސް ތައް ހިއްސާ ކުރަމުން ގެންދިޔައީމެވެ. އަދި ވީވަރަކުން އޭނައާއި ބައްދަލުކުރަމުން ގެންދިޔައީމެވެ. ހުމެއިދު ކޮލެޖް ނިންމާފަ ގެއަށްދާ މަގުމަތިން ބައެއް ފަހަރު ބައްދަލުވެއެވެ.
ސިމެސްޓަރ ބްރޭކް ލިބުމުން ހުމެއިދުއާއި އެކު ގިނަވަގުތު ހޭދަކުރުމުގެ ފުރުސަތު އަހަންނަށް ފަހިވިއެވެ. ރައްޓެހި ކުދިންކޮޅަކާއި އެކު ހިތްފަސޭހަ މަންޒިލަކަށް ހިތްއުފާކޮށްލުމަށް ދަތުރެއް ރޭވީމެވެ. ނަސީބު ރަނގަޅުކަމުން ހުމެއިދުވެސް ދާން އެއްބަސް ވިއެވެ. 'ކެމަރުން ހައިލެންޑ'ް ގައި އަހަރެމެން ހޭދަކުރި އެއްރެޔާ އެއްދުވަސް އެއީ އަހަރެންގެ ހަޔާތުގައި އައި އެންމެ އުފާވެރި ވަގުތުތަކެވެ. ތަފާތު ގިނަވައްތަރުގެ މާ ތަކާ ގަސްތަކުން ޒީނަތް ކުރެވިފައިވާ މި ހިތްފަސޭހަ މާހައުލުގައި ވަގުތުތައް ހޭދަވެގެން ދިޔައީ ކިހިނެއް ކަންވެސް އަހަންނަށް ނޭނގުނެވެ.
އަހަރެމެންގެ ލޯބީގެ ފެށުން ފާހަނގަ ކުރާނެ ތާރީހެއް އަހަންނަކަށް ފާހަނގަ ކުރެވިފައެއް ނެތެވެ. އެ ސުވާލު ހުމެއިދުއާއި ކުރުމުން ސަމާސާ ގޮތަކަށް އަހަރެމެން މިއުޅެނީ ލޯބި ވެގެންހޭ ސުވާލުކޮށްލިއެވެ. އާއެކެވެ. އަހަރެމެން މިވަނީ ހަގީގީ ލޯތްބެވެ. ނަމަވެސް ހުމެއިދު އަދިވެސް ރަސްމީސިފައެއްގައި އަހަންނަށް ލޯބި ހުށަނާޅައެވެ. އެއީ އަހަރެން އެންމެ ދެކެން ބޭނުންވާ ދުވަހެވެ. އަހަރެން ބޭނުންވަނީ ހުމެއިދު ވަރަށް ރޮމެންޓިކް ގޮތަކަށް އަހަންނަށް ޕްރޮޕޯސް ކުރާށެވެ. އަހަރެން ވަނީ ކެއްމަދުވެފައެވެ. ހުމެއިދުގެ ބެސްޓް ފްރެންޑް ކައިރީ ހުމެއިދު އަހަންނަށް ޕްރޮޕޯސް ކުރާނެ ދުވަހެއް ނުވަތަ އެފަދަ އެއްވެސް ވާހަކައެއް އޭނަގެ ފަރާތުން އެނގިފައިވޭތޯ ސުވާލުކުރީމެވެ. އަހަންނަށް ލިބުނީ ވަރަށް އުފާވެރި ޖަވާބެކެވެ. ކޮންމެވެސް ހާއްސަ ދުވަހަކާ ދިމާކޮށް ހުމެއިދު އަހަންނަށް ޕްރޮޕޯސް ކުރާނެ ކަމުގެ އިޝާރާތެއް އަހަރެންނަށް ލިބުނެވެ.
އުފާވެރި ދުވަހަކަށް ފަހު އުފާވެރި ދުވަހެއް ތަކުރާރު ވަމުންދިޔައެވެ. ހުމެއިދު އޭނަގެ މަންމަ ކައިރީ އަހަރެމެން ދެމީހުން ގުޅުނު ވާހަކަ ރަސްމީކޮށް ބުންޏެވެ. އަދި އޭނަގެ މަންމަ އާއި ބައްޕަގެ ރުހުން އަހަރެމެންގެ މި ގުޅުމަށް އޮތްކަން އެނގުމުން އަހަންނަށް އުފަލުން ރޮވުނެވެ.
އަހަރެން ހުމޭދުއާއި އެކު ނަގާފަ ހުރި ފޮޓޯތައް "ފޭސްބުކް" ގައި އަޕްލޯޑް ކުރީމެވެ. މުޅި ދުނިޔެއަށް އަހަރެމެންގެ ގުޅުން އިޢުލާން ކުރީމެވެ. އަހަރެން މިއަދު މިހުރީ ވަރަށް އުފާވެފައެވެ. އަބަދުވެސް ހުރެވެނީ ހުމެއިދުގެ ހިޔާލީ ދުނިޔޭގައެވެ. އަހަރެމެންގެ ހަޔާތުގެ ތަސްވީރުތަށް ހިޔާލީ ފޮތެއްގައި ކުރަހަމުން ގެންދިޔައީމެވެ. ދިރިއުޅުން ބަދަހިކުރާނެ ގޮތާއި ހޯދާނެ ކުދިންގެ އަދަދާއި އެކުދިންނަށް ކިޔާނެ ނަންތަކަށް ދާންދެއް އެ ފޮތުގައި ލިޔެވެމުން ދިޔައެވެ.
އަހަރެން ބޭނުންވީ އަހަރެންގެ ކިޔެވުން ނިމުނުހާ އަވަހަކަށް ކައިވެނިކުރާށެވެ. އެގޮތުން ހުމެއިދު ކައިރީ ކައިވެނީގެ ވާހަކަ ތަންކޮޅެއް ގިނައިން ދެއްކެން ފެށުނެވެ. ނަމަވެސް އެއީ ހުމެއިދު އެހާ ޝައުގުވެރިވި މަޢުލޫއަކަށް ނުވިއެވެ.
ދުވަސް ތައް ފާއިތުވަމުން ދިޔައެވެ. މަޑުމަޑުން ހުމެއިދުއަށް ބަދަލު އަންނަކަން ފާހަނގަ ވިއެވެ. އަހަންނާ ވާހަކަ ދެއްކޭލެއް މަދުވިއެވެ. ބިޒީ ކަމަށް ބުނެ ބައްދަލުކުރެވޭލެއް މަދުވާން ފެށިއެވެ. ނަތީޖާއަކަށްވީ އަހަންނަށް ޝަކުވާ ކުރެވެން ފެށުމެވެ. އަހަރެންގެ ޝަކުވާތައް ހުމެއިދުއަށް އިތުރު އުނދަގުލަކަށް ވާކަން ފާހަނގަ ކުރެވުނެވެ. ނަމަވެސް އަހަރެން ކުރާނީ ކީއްހެއްޔެވެ. އަހަރެން އޭނަދެކެ އިންތިހާއަށް ލޯބިވެއެވެ. އޭނައާއި ވަކިން އުޅުމަކީ ކެއްވާވަރުގެ ކަމަކަށް ނުވިއެވެ. ޝަކުވާ ކުރެވެނީ ލޯބިވެވޭލެއް ބޮޑުކަމުންނެވެ. ހުމެއިދު އެކަން ގަބޫލުކުރާނަމަ ހާދަ ރަނގަޅެވެ.
މިއަދުމީ ހުމެއިދު އަހަންނާ ބައްދަލުކުރާނެ ކަމަށް ބުނި ދުވަހެކެވެ. ނަމަވެސް އޭނައެއް ނާދެއެވެ. އެތައްފަހަރު ފޯނު ކުރެވިއްޖެއެވެ. އެތައް މެސެޖެއް ކުރެވިއްޖެއެވެ. ނަމަވެސް އެއްވެސް ރިޕްލައިއެއް ނުލިބުނެވެ. އަހަރެންގެ ކުންހީތައް ޔަގީން ކުރެވެން ފެށިއެވެ. އެއީ ކުރީގެ ހުމެއިދެއް ނޫނެވެ. އޭނަ މުޅިން ބަދަލުވެއްޖެއެވެ. އަހަރެން އިގްނޯ ކުރަން ފަށައިފިކަން މިހާރު ޔަގީންވެއްޖެއެވެ. އަހަރެން ވަރަށް ދެރަވިއެވެ. އަދި ރުޅިވެސް އައެވެ. ޝަކުވާގެ ފުނިވަރެއް މެސެޖެއްގެ ސިފައިގައި ހުމެއިދުއަށް ފޮނުވުމަށް ފަހު އެނދުގައި އޮށޯތީމެވެ. ދެލޮލުން ފޭދިފައި ހުރި ކަރުނަތައް އަހަރެންގެ ކޮންޓްރޯލުން ނެއްޓިއެވެ. އަހަންނަށް ރޯން އޮވެވުނީ ކިހާ އިރަކުކަން ވެސް އަހަންނަށް ނޭނގުނެވެ.
އޭގެ އަނެއް ދުވަހެވެ. ކެއްމަދުވެފައިވާ ހިތަކައިގެން އަހަރެން ހުމެއިދުއާއި ބައްދަލުކުރީމެވެ. ހުމެއިދު ހުރީ ވަރަށް ހަމަޖެހިފައެވެ. ކުރިއެކޭ އެއްވެސް ތަފާތެއް ނެތެވެ. އޭނަގެ ދުލުން ބުނަމުން ގެންދިޔަ ބަސްތައް ފިޔަވައެވެ. އަހަރެންގެ ކޯލްތަކަށް ޖަވާބު ނުދެވުނީ ކްރެޑިޓް ނެތުމުން ކަމަށް ބުންޏެވެ. އަހަރެންނާއި ބައްދަލުކުރަން ނާދެވުނީ ބޭބެ އައިސްގެން އުޅޭތީ ބޭބެ އާއި އެކު ބިޒީ ވުމުން ކަމުގައި ބުންޏެވެ.
އަހަރެން ހުމެއިދުއަށް ވަރަށް އިތުބާރު ކުރަމެވެ. އޭނަބުނާ ކޮންމެ އެއްޗެއް ގަބޫލު ކުރަމެވެ. ނަމަވެސް ދެން އަހަންނަށް އިވެންފެށީ އަހަރެންގެ ހަމަބުއްދި އަށް ގަބޫލުކުރެވޭ ކަހަލަ ވާހަކަތަކެއް ނޫނެވެ.
"އަހަންނަށްހީވަނީ އަޝްރާ އަށް އެންމެ އެކަށީގެންވާ މިހެއް ނޫންހެން އަހަންނަކީ!"
ހުމެއިދު ވަރަށް ސީރިއަސްވެ ހުރެ ވާހަކަދެއްކިއެވެ. ނަމަވެސް ހުމެއިދު އެހެން އެބުނީ ކީއްވެކަމެއް އަހަންނަކަށް ނުވިސްނުނެވެ. މިއޮއްހުރިހާ ދުވަހު އަހަރެން ދެކެމުން އައީ ހުމެއިދު އެއީ އަހަރެން ގެ ނަސީބު ކަމުގައެވެ. އޭނައާއި އެކު ހޭދަކުރި ދުވަސްތަކަކީ އަހަރެންގެ ޙަޔާތުގައި އައި އެންމެ އުފާވެރި ދުވަސް ތަކެކެވެ. ހުމެއިދުގެ މޫނުމައްޗަށް މާޔޫސްކަން ވެރިވިއެވެ. ދެން އަހަންނަށް އިވުނީ އަހަރެންގެ ހިތް ކުދިކުދި ވި ކަހަލަ ވާހަކައެކެވެ.
"ވަރަށް މަސައްކަތް ކުރެވިއްޖެ، ނަމަވެސް އަހަންނަކަށް އަޝްރާ ދެކެ ލޯތްބެއް ނުވެވުން.. އަހަރެން ހީކުރީ އަހަންނަށް އަޝްރާ ދެކެ ލޯބި ވެވޭނެ ކަމަށް..އެކަމް...."
އަހަރެން ބަސްހުއްޓުނެވެ. ބުނާނެ އެއްޗެއް ނޭގުނނެވެ. މިއޮއްހުރިހާ ދުވަހު އަހަރެން ހީކޮށްގެން ހުރީ އަހަރެމެން މީ ދެލޯބިވެރިން ކަމަށެވެ. މުޅި ދުނިޔެ އަށް އެކަން އަހަރެން އިޢުލާނު ވެސް ކުރީމެވެ. މީ އަހަންނަށް ފެންނަ ހުވަފެނެއް ބާއޭ ހިތައް އެރިއެެވެ. އަހަރެން ރޯން ބޭނުން ވިއެވެ. އަދި ވަރަށް ބާރަށް ހަޅޭލަވައިގަންނަން ބޭނުން ވިއެވެ. ނަމަވެސް އަހަރެންގެ އިޙުސާސް ތައް ހުމެއިދުގެ ކުރިމަތީގައި ކޮންޓްރޯލް ކުރީމެވެ. ހުމެއިދު ދެކެ އަހަރެން އިންތިހާ އަށް ލޯބިވާތީއެވެ.
ހުމެއިދު އަހަންނަށް ވިސްނައިދެމުން ދިޔައީ ހަމަ ހޭގައި ހުރި މީހަކަށް ގަބޫލު ކުރެވޭނެ ޒާތުގެ ވާހަކަ ތަކެއް ނޫނެވެ. އަހަރެންދެކެ ލޯތްބެއް ނުވެވުނޭ ބުނަށް ހުމެއިދު އަށް އެހާ ފަސޭހަ ކަމުގައި ވިޔަސް އެވާހަކަ ގަބޫލުކުރަން އަހަންނަށް އެހާ ފަސޭހައެއް ނޫނެވެ. ނަމަވެސް ހުމެއިދުގެ ކުރިމަތީގައި އަހަރެން ހަނުހުރީމެވެ. އަދި އޭނަގެ އެދުމުގެ މަތިން މިއަދުން ފެށިގެން ދެރަޙުމަތްތެރިން ގޮތުގައި ވުމަށް އެއްބަސް ވީމެވެ. އެއީ އަހަންނަށް ފަސޭހަކަމަކަށް ނުވި ނަމަވެސް އަހަރެން މިވާ ލޯބީގެ ހައްގުގައި އެކަމަށް އެއްބަސް ވީމެވެ.
އަހަރެން ހުރީ ގެއަށް އާދެވޭނެ ވަގުތެއްގެ އިންތިޒާރުގައެވެ. ގެއަށް ވަނުމާެއިއެކު އަހަރެންގެ ދެލޮލުން ހޯސްލާފައި ކަރުނަތައް އޮހޮރިގެން ދިޔައެވެ. މޫނުމައްޗަށް އަނދިރިވިއެވެ. ބޮލުގައި ރިއްސަން ފެށިއެވެ. އަހަރެން އަވަހަށް އެނދުމައްޗަށް ވެއްޓިގަތީމެވެ. އަދި އަހަރެންގެ ހިތް ފުރެންދެން ކަރުނައަޅާ ރުއީމެވެ.
ހުމެއިދު އަހަންނަށް އެހެން ހަދަން ޖެހުނީ ކީއްވެކަމެއް އަހަންނަކަށް ނޭނގުނެވެ. އަހަންނަށް ހުމެއިދުދެކެ ރުޅި އާދެވުނެވެ. ނަމަވެސް އަހަރެން ހިތްތިރިކުރީމެވެ. އަދިވެސް އަހަރެން ހުމެއިދު ބޭނުމެވެ. ރަހުމަތްތެރިއެއްގެ ގޮތުގައި ހުރެގެން ނަމަވެސް އަހަރެން އަދި ހުމެއިދު ޙާސިލްކުރުމަށް އަޒުމް ކަނޑައެޅީމެވެ. އަހަންނަށް ހުމެއިދު ނުލިބުން އެއީ އަހަންނަށް ގަބޫލު ކުރެވޭ ވަރުގެ ކަމަކަށް ނުވިއެވެ. އަހަރެންގެ ފުރަތަމަ ލޯބި ގެންލިގެން ދިޔަގޮތަށް އަހަރެންގެ އަތުން ހުމެއިދު ބީވެގެން ދާކަށް އަހަރެން ބެނުމެއް ނޫނެވެ.
ދުވަސް ތައް ފާއިތުވަމުން ދިޔައީ ވަރަށްވެސް ހިތްދަތި ގޮތަކަށެވެ. ކެއުމުންނާއި ނިދުމުން އަހަރެން މުޅިން މަހުރޫމް ވި ކަހަލައެވެ. ކޮންމެ ރެއެއް ވޭތުވަނީ ރުއިމުގައެ. ނިދަން އޮވެ އޮވެ ނުނިދުމުން ތެދުވެ ނަމާދު ކުރަނީއެވެ. އަދި އަހަންނަށް ހުމެއިދުގެ ލޯބި ލިބޭތޯ ތަކުރާރުކޮށް ﷲ ގެ ހަޞުރަތުން ދުޢާ ކުރަނީއެވެ. ދެން އަހަރެންގެ ލެޕްޓޮޕުން ޔާސީން ސޫރަތް ޖަހައިގެން އަޑުއަހަން އިންނަނީ އެވެ. އަހަރެންގެ ހިތައް ކުޑަނަމަވެސް ފިނިކަމެއް ލިބެނީ އޭރުންނެވެ.
ހުމެއިދު އާއި ވާހަކަދެއްކުމުގެ ފުރުސަތު މަދުން ނަމަވެސް އަހަންނަށް ލިބެއެވެ. އަދި ބައެއް ފަހަރަށް އޭނަ އާއި ބައްދަލުވެސް ކުރެވެއެވެ. އަހަރެން ހުމެއިދުގެ ލޯބި ހާސިލް ކުރަން ކުރެވެން އޮތް ކޮންމެ ކަމެއް ވެސް ކުރީމެވެ. އެކަމަށްޓަކައި ފުރޮޅެން އޮތް ކޮންމެ ގާކޮޅެއްވެސް ފުރޮޅީމެވެ. "އިންޓަނެޓް" ގެ ޒަރީޔާއިން ތަފާތު ގިނަބައެއްގެ ހިޔާލު ހޯދީމެވެ. އެތައް ބައެއްގެ ފަރާތުން ކައުންސިލިން ހޯދީމެވެ. "ހައުޓު ވިން އަ ބްރޭކަޕް" މިފަދަ އެތައް ރިސާޗް ތަކެއް އަހަރެން ދިރާސާ ކުރީމެވެ.
-
އަހަރެން ދެން އަމަލުކުރީ އަހަރެންނަށް ހޯދުނު ރިސާޗް މައުލޫމާތުގެ އެހީގައެވެ. އެގޮތުން ހިތާ ދެކޮޅަށް ނަމަވެސް އަހަރެން ހުމެދުއާއި ދުރުވާން ފެށީމެވެ. އަހަރެންގެ ހުސްވަގުތު ތައް ހޭދަ ކުރަނީ އަހަރެންގެ ހިތުގެ އުދާސް ތައް ކަރުދާހުގައި ލިއުމުގައެވެ. އަދި އެހެން މީހުންގެ ކުރިމަތީގައި އަހަރެން ވަރަށް "ނޯމަލް" ކަމަށް ދެއްކިގެން އުޅުނީމެވެ. އަހަރެންގެ މޫނުމަތީގައިވާ މާޔޫސްކަން ވަންހަނާ ކުރެވޭތޯ މަސައްކަތް ކުރީމެވެ. އަދި އަހަރެން ހުމެއިދުގެ ހަނދާން ނުކުރާކަމަށް ހެދިގެން އެހެން ކުއްޖަކާ ރައްޓެހިވެގެން އުޅޭކަމަށް ހެދިގެން އުޅުނީމެވެ. މިހުރިހާ ކަމެއް އަހަރެން މިކުރަނީ ހުމެއިދު އަހަރެންގެ ކައިރިއަށް އެނބުރި އަންނާނެ ކަމުގެ ކުޑަ ކުޑަ އުންމީދެއް އޮވެގެންނެވެ. އަދި ހުމެއިދުގެ އެގްޒާމް ދުވަސް ވަރު ކަމުން އަހަރެންގެ ފަރާތުން ކުޑަނަމަވެސް އުނދަގުލެއް އޭނައަށް އިހުސާސް ވިޔަ ނުދިނުމަށެވެ.
ކަންމިހެން ހުރިނަމަވެސް އަހަރެންގެ ހިތުގައި އަދިވެސް ވަނީ ހުމެއިދުއެވެ. އެ ހަނދާންތަކެވެ. ދާދި އަވަހަށް ހުމެއިދު އަހަރެންގެ ހަޔާތަށް އެނބުރި އަންނާނެ ކަމުގެ އުންމީދު ތަކެވެ. އަހަރެން މިވާލޯބި އޭނައަށް ވިސްނިގެން، އަދި އޭނަވެސް އަހަރެން ދެކެ ލޯބިވާކަން އޭނައަށް ޔަގީންވެގެން އަންނާނެ ކަމުގެ އުންމީދު ތަކެވެ.
އަހަންނަށް ލިބުނު ރިސާޗް މައުލޫމާތުގެ އެހީގައި ހުމެއިދުގެ ލޯބި އަލުން ހޯދުމަށް ކުރެވެން ހުރި ހުރިހާ ކަމެއް ވެސް ކުރީމެވެ. އެންމެ ފަހު ކަމަކަށް އަހަރެންގެ އަތުން ސިޓީއެއްގެ ސިފައިގައި އަހަރެން ގެ ހިތުގެ ވިންދުތައް ލިޔެފަ ހުމެއިދުއަށް ފޮނުވަން ގަސްތު ކުރީމެވެ.
ދުވަހަކީ އޮކްޓޯބަރު މަހުގެ އޮނަތިރީސް ވަނަ ދުވަހެވެ. އަހަރެން ބޭނުންވީ އަހަރެން ގެ ހިތުގެ އެދުންތައް ގަލަމުގެ ދެލީގެ އެހީގައި ކަރުދާހަށް އެއްފަހަރާ އޮއްސާލާށެވެ. އަހަރެން އުންމީދު ކުރަނީ މި ސިޓީ ކިއުމަށް ފަހު ހުމެއިދު އަހަރެންގެ ހަޔާތަށް އެނބުރި އައުމެވެ.
"އަހަރެން މި ސިޓީ މިލިޔަނީ، ހުމެއިދުވެސް ބުނިފަދައިން މިދުވަސް ވަރަކީ އެގްޒާމް ދުވަސްވަރު ކަމަށް ވެފައި، ހުމެއިދުއަށް ފޯނުކޮށްގެން ނުވަތަ މެސެޖް ކޮށްގެން އުނދަގޫ ކުރަން ބޭނުން ނުވާތީއެވެ. އަހަރެން މި އުންމީދު ކުރަނީ އަހަރެންގެ ހިތުގެ މި ޝުއޫރުތައް މި ގޮތަށް ލިއުމުން އަހަރެންގެ ހިތަށް ކޮންމެވެސް ވަރެއްގެ ލުއިކަމެއް ލިބޭނެ ކަމަށެވެ. ލޯބި ތިބުނަނީ ލޯބި އަހަންނާ ދުރުވީ އަހަންނަށް ރަނގަޅަކަށް ކަމަށެވެ. ނަމަވެސް ތީ ކުށް ހީއެކެވެ. އަހަރެން ދެކެނީ އަހަރެންގެ ހުރިހާވެސް އުފަލަކީ ލޯބި ކަމަށެވެ. ވީއިރު ލޯބި އަހަންނާ ވަކިވެއްޖެނަމަ ދެން އޮތީ ކޮން އުފަލެއް ހެއްޔެވެ.
ލޯބި އާއި ނުލާ އެންމެ ދުވަހެއްވެސް އަހަންނަށް ކެއްނުކުރެވޭނެ ކަމަށް އަހަރެން ނުބުނަން ހެއްޔެވެ. އަހަރެންގެ ހިތް މިއޮއް މަރުވަނީއެވެ. ލޯތްބާއި ވަކިން ހޭދަކުރަމުން މިދާ އެންމެ މިނެޓެއްވެސް އެއްދުވަހާ އެއްވަރެވެ. އަހަންނަކަށް މި ހިޔާލު ތަކަކާ ދުރަކަށް ނުދެވުނެވެ. ވަރަށް ހިތްވަރު އެބަ ކުރަމެވެ. ގިނަ ވަގުތު މި ހޭދަކުރަނީ ޤުރުއާން އަޑުއެހުމުގައެވެ. ދީނީ ދަރުސްތައް އަޑުއެހުމުގައެވެ. އަހަރެންގެ ނަފްސަށް ކުޑަނަމަވެސް ދިރުމެއް ލިބެނީ އޭރުންނެވެ. ﷲގެ އިރާދަފުޅުން ކުޑަނަމަވެސް ހިތްވަރެއް ލިބެނީ މިގޮތުންނެވެ. ބޭނުމަކީ ލޯބި އެގްޒާމް ނިމެންދެންވެސް އަހަންނަށް ކެއްކޮށްލެވޭތޯ މަސައްކަތް ކުރުމެވެ.
ލޯބިވާއެވެ. ހަގީގަތަކީ މިއީއެވެ. އަހަންނަށް ލޯބި އާއި ނުލާ ދެން ދިރި ނުހުރެވޭނެއެވެ. އަހަރެންގެ މުސްތަގުބަލު ބިނާވެފައިވަނީ ލޯބިވާ އާއި އެކުގައެވެ. ލޯބި އަހަންނާ ވަކިވެއްޖެ ނަމަ އަހަރެންގެ ދިރިއުޅުން ވެސް އަހަންނާ ވަކިވީއެވެ. އަހަރެންގެ ވަށައިގެން ވާ ކޮންމެ އެއްޗެއްވެސް ހަނދާންކޮށްދެނީ ތި ސޫރައެވެ. ކުރިން ދުވަހު ވާރޭ ވެހެމުން ދިޔައިރު އެ މަންޒަރު ބަލަން އަހަންނަށް އުނދަގޫވިއެވެ. އަހަންނަށް ހީވަނީ އަބަދުވެސް ލޯބި އެ ވާރޭގެ ތެރެއިން ލާފަ އަހަރެންގެ ކައިރިއަށް އަންނަހެންނެވެ. ނަމަވެސް އެއީ ހިޔާލެއް ކަން އެނގުމުން އަހަރެންގެ ހިތް ކުދި ކުދިވެގެން ދާ ކަހަލައެވެ. ޔޯގާ ކުލާހަށް ދާން ހިތަށް އެރިޔަސް ހަނދާންވަނީ ހަމަ ތިޔަ ސޫރައެވެ. ޕޫލް އަށް ދާން ހިތަށް އެރިޔަސް ހަނދާން ވަނީ ހަމަ ތިޔަ ސޫރައެވެ. އަހަރެން ކޮންމެ ކަމެއް ކުރިޔަސް އެވާހަކަތައް ހިއްސާ ކުރަމުން އައީ ހަމަ ލޯބި އާއެވެ. އަހަރެން ކުރާ ކަންތަކަށް ފާޑު ކިޔަމުން ގެންދިޔައީވެސް ހަމަ ލޯބި ނޫން ހެއްޔެވެ. އެކަން ވަނީ އަހަރެން ގަޔާވާ ކަމަކަށެވެ. އެހެން ނަމަވެސް އަހަރެން ޔޯގާ ކުލާހަކަށް ނުދަމެވެ. ލޯބި މަތިން މާބޮޑަށް ހަނދާން ވާތީވެ، ދާނެހާ ހިތްވަރު މި ބަލިހިތަށް ނުލިބުނީއެވެ. އަހަރެން މި ޝަކުވާ ކުރަނީ އަހަރެން އަމިއްލަ ނަފްސަށެވެ. އަހަރެމެން ދިރިއުޅެން ހިޔާލީ ގެއެއް ބިނާ ކުރީމު ނޫންހެއްޔެވެ. މާދުރުގައި ފަރުބަދަ ތަކުގެ ވާދީގެ ތެރޭގައި ކުޑަގެއެއް ބިނާކުރީމު ނޫންހެއްޔެވެ. އެތަނުގެ ވަށައިގެން ވާ ފެހިކުލައިގެ ވިނަގަނޑު މަތީ އަހަރެމެންގެ ލޯބި ލޯބި ދަރިފުޅު ކުޅެން އުޅޭ މަންޒަރު ސިފަކުރީމު ނޫންހެއްޔެވެ. މި ހިޔާލުތައް އައުމުން އަހަރެންގެ ލަގޮނޑިއަށް ކެތެއް ނުކުރެވެއެވެ.
ލޯބިވާ އަށް އެނގޭ ނޫންހެއްޔެވެ. އަހަރެންގެ ހަޔާތުގެ ބާކީ ދުވަސް ތައް ހޭދަކުރަން ބޭނުން ވަނީ ލޯބިވާޔާ އެކުގައެވެ. ކޮންމެ ދުވަހަކު ހެނދުނު ހޭލާއިރު ލޯބި އަހަރެން ކައިރީ އޮތުމަށް ބޭނުން ވެއެވެ. އަހަރެން މުސްކުޅިވާން ބޭނުންވަނީ ލޯބީގެ ހިދުމަތުގައެވެ. މީ އަހަރެން މާކުރިން ނިންމާފައިވާ ނިންމުމެކެވެ. ވީއިރު އަހަރެން މި ބަދަލުކުރާނީ ކިހިނެއްހެއްޔެވެ. އަހަރެން ލޯބިވާ އަށް އިންތިޒާރުކުރުން ދުވަހަކުވެސް ހުއްޓައެއް ނުލާނަމެވެ. ކިތަންމެ ދުވަހެއް ވޭތުވެގެން ދިޔަކަމުގައިވިޔަސް ފަރުވާލެއް ނެތެވެ. އަދި ކިތަންމެ ވޭނެއް ތަހައްމަލު ކުރަންޖެހުނު ކަމުގައިވިޔަސް މެއެވެ. ލޯބި އަހަންނަށް ބޭނުންވި ކޮންމެ ހިނދެއްގައި އަހަރެން ލޯބީގެ އިންތިޒާރުގައި ހުންނާނަމެވެ.
ލޯބި ދެން ދުވަހަކުވެސް ލޯބި ތީ އަހަންނާ އެކަށީގެން ވާ މީހެއް ނޫނޭ ނުބުނާށެވެ. ހަގީގަތަކީ ލޯބި ތީ އަހަރެންގެ ހަޔާތަށް އައި އެންމެ ކަމުދާ ބައިވެރިޔާއެވެ. ލޯބި އާއި އެކު ހޭދަކުރެވުނު ވަގުތު ތަކަކީ އަހަރެންގެ ހަޔާތުގައި އައި އެންމެ އުފާވެރި ވަގުތު ތަކެވެ. އަހަރެން ބޭނުންވާ ހުރިހާ ސިފަތަކެއް ލޯބީގެ ގައިގައި އެބަހުއްޓެވެ. ލޯބި ކޮންމެ ސިފައެއް ގައި ހުރިނަމަވެސް ތީ އަހަރެން އެންމެ ދެކެން ބޭނުންވާނެ ސޫރައެވެ. ލޯބި ބުނީމު ނޫންހެއްޔެވެ. އަހަންނަށް ބޭނުން ވާނީ އަހަރެންދެކެ ލޯބިވާ، އަހަންނަށް ކެއާ ކުރާނެ ރަނގަޅު ކުއްޖެކެވެ. ލޯބިވާއެވެ. އެކުއްޖަކީ ހަމަ ލޯބި އެވެ. ސަބަބަކީ ލޯބިވާ އަހަންނަށް ކެއާ ކުރި ވަރަށް އެހެން އެކަކުވެސް އަހަންނަށް ކެއާކޮށްފަ ނުވާތީއެވެ. ލޯބި ހީކުރަނީ ލޯބި އަހަންނާ ދުރަށް ދިޔައީ އަހަންނަށް ދެރައެއް ދޭން ބޭނުން ނުވާތީ ކަމުގައި ވަނީނަމަ ބުނެލަން ބޭނުން ވަނީ، ލޯބި އަހަރެން ދޫކޮށްލައިފިނަމަ އެއަށްވުރެ ބޮޑު ދެރައެއް ދެން އަހަންނަކަށް ދުވަހަކުވެސް ނުލިބޭނެއެވެ. އަހަރެންގެ ހިތަށް ލިބޭނެ އަނިޔާ ދުވަހަކުވެސް ރަނގަޅެއް ނުކުރެވޭނެއެވެ. މިހާރުވެސް އަހަރެންގެ ހިތަށް ވަރަށް ތަދުވެއެވެ. ތެދަށް ބުނަނީނަމަ މިވަގުތުވެސް އަހަރެންގެ މެޔަށް ވާ ތަދު އަހަންނަށް އިހުސާސް ކުރެވެއެވެ. ލޯބިވާއެވެ. އަހަންނަށް މިހެން ނުހަދާށެވެ. އަދި ލޯބިވާ ގެ އަމިއްލަ ނަފްސަށްވެސް ތިހެން ނުހަދާށެވެ. ލޯބި އަހަރެންގެ ހަޔާތުން މުޅިން ދުރަށް ދިޔުމުގެ ކުރިން އަހަރެން މަރުވާން ބޭނުމެވެ. އަހަންނަށް ކެތެއް ނުކުރެވޭނެއެވެ.
ލޯބިވާއެވެ. މީ އަހަރެމެން ބޭނުންވި ގޮތެއް ނޫނެވެ. ކޮންމެ ކަހަލަ ދިރިއުޅުމެއްގައި ވެސް މައްސަލަތައް ޖެހޭނެއެވެ. އެ މައްސަލަތައް ޙައްލުކުރުމުން އެ ނިމުނީއެވެ. ފަހަރެއްގައި އަހަރެމެން އަދި އެހާ ތަސައްރަފު ނުފުރެނީ ކަމަށް ވެދާނެއެވެ. އެކަމް އަހަންނަށް ޔަގީނެވެ. އަހަރެމެން ނަށް މި މައްސަލަ ހައްލުކުރެވޭނެއެވެ. ކުރެވެން ޖެހޭނެއެވެ. އަހަރެމެން ހަމަ އެހާ ބަލިކަށީ ހެއްޔެވެ؟
ލޯބިވާ އެވެ. އަހަރެން ގަބޫލުކުރަމެވެ. އަހަންނަށްވެސް ކަންތައް ކުރެވުނީ އެންމެ ރަނގަޅަކަށް ނޫނެވެ. އެންމެ ދުވަހަކު ލޯބިވާގެ ހަބަރެއް ނުވުމުން ރުޅި އާދެވުނީ އެވެ. މާބޮޑަށް ލޯބި މަތިން ހަނދާންވުމުން އެގޮތަށް ކަންތައް ވީއެވެ. އަބަދުވެސް ލޯބިވާގެ މުށުތެރޭގައި ވުމަށް އެދެވުނީއެވެ. ލޯބިވާ އެވެ. އަހަންނަށް ކަންތައް ކުރެވުނީ އެންމެ ރަނގަޅަކަށް ނޫނެވެ. އަހަންނަށް މާފުކުރާށެވެ. ދެން ދުވަހަކުވެސް އެހެންނެއް ނުވާނެއެވެ. އަހަންނަށް ލޯބިވާ އާއި ނުލާ އެއްވެސް އުފަލެއް ނުލިބޭނެއެވެ. ލޯބިވާ އެވެ. އެފަދަ ކުޑަ ކުޑަ ކަމަކާ ހެދި އަހަރެމެންގެ މި ދިރިއުޅުން އެއްލާނުލާށެވެ. އަހަންނަށް އަދި އެއް ފުރުސަތު ދޭށެވެ. ތިޔަ ރީތި ހިނިތުންވުން ހާސިލްކުރުމަށްޓަކައި ކޮންމެފަދަ ގުރުބާނީއެއް ވެސް ވެދާނަމެވެ.
އެންމެ ފަހަރަކުނަމަވެސް އަހަންނަށް މާފު ހައްގު ނުވަނީ ހެއްޔެވެ. ލޯބި އަހަރެންގެ ހަޔާތަށް އައުމުން އަހަރެން ގަބޫލުކުރީ އަހަރެން މީ މިދުނިޔޭގައިވާ އެންމެ އުފާވެރި އެކަކު ކަމުގައެވެ. ލޯބިވާއެވެ. އަހަރެންގެ އަތުން އެ އުފާވެރިކަން ބީވެގެން ދިޔަ ނުދޭށެވެ. އަހަރެންނަށް ހިނިތުންވުމެއް ގެނެސްދޭ ހަމައެކަނި ސަބަބަކީ ހަމަ ތި ލޯތްބެވެ. ލޯބިވާ އެވެ. އަދި އިތުރަށް ވިސްނާލާށެވެ. އަހަރެން ވަގުތު ދޭނަމެވެ. އަހަރެމެން ދެކެމުން އައި ހުވަފެން ތަކާދޭތެރެ އަދި އެއްފަހަރު ވިސްނާލަ ބަލާށެވެ".
ސިޓީ ލިޔެ ނިމުނު އިރު ރަނގަޅަށްވެސް އަހަންނަށް ރޮވިއްޖެއެވެ. އަހަރެން ފުންކޮށް ވިސްނާލީމެވެ. ހުމެއިދުއަށް މިސިޓީ ފޮނުވުން ރަނގަޅުވާނެ ހެއްޔެވެ. އޭނަ ހީކުރާނީ ކީކޭ ބާއެވެ. ފަހަރެއްގައި އަހަރެންދެކެ ރުޅިއައިސްފާނެ ބާއެވެ. އޭރުން އަހަރެމެން ދެމެދުގައި މިއޮތް ރަހުމަތްތެރިކަން ވެސް ނެތިގެން ހިނގައިދާނެއެވެ. މިކަހަލަ އެތައް ހިޔާލުތަކަކުން އަހަރެންގެ ހިތަށް ނުތަނަވަސް ކަން ވެރިވެގެން ދިޔައެވެ.
އަހަރެން ލިޔުނު ސިޓީ ވީދާލަން ބޭނުން ވިއެވެ. ނަމަވެސް ސިއްރެއް ގޮތުގައި އެ ބޭއްވީމެވެ. ހުމެއިދުއަށް އެ ފޮނުވާނެހާ ހިތްވަރެއް އަހަންނަކަށް ނުލިބުނެވެ.
ހުމެއިދުގެ އެގްޒާމް ނިމި ޗުއްޓީވެސް ލިބިއްޖެއެވެ. އަދިވެސް އޭނަގެ ފަރާތުން އެއްވެސް އިޝާރާތެއް އަހަންނަކަށް ނުލިބެއެވެ. އަހަރެން ކުރި ހުރިހާ އުންމީދުތަކެއް ބޭކާރުވީ ހެން ހީކުރެވެން ފަށައިފިއެވެ. އަހަރެންގެ އެގްޒާމް ވެސް ކައިރިވަނީ އެވެ. މިއީ އަހަރެންގެ އެންމެ ފަހު އަހަރެވެ. ރަނގަޅު ނަތީޖާއެއްް ވެސް ހޯދަން ބޭނުން ވެއެވެ. ނަމަވެސް އަހަންނަކަށް ކިޔެވުމަކަށް އެއްވެސް ސަމާލު ކަމެއް ނުދެވެއެވެ. ހުމެއިދު އެނބުރި އަހަރެންގެ ހަޔާތަށް އަންނާނެ ކަމުގެ އިންތިޒާރު ގައި އެތައް މަހެއް ގުނިއްޖެއެވެ. އޭނަގެ ހިތުގައި އަހަންނަށް އެއްވެސް ކުލުނެއް ހަމަ ނެތީހެއްޔެވެ.
އޭގެ އަނެއް ދުވަހެވެ. އަހަރެން ބޭނުންވީ ހުމެއިދު އާއި ބައްދަލު ކުރަން އޭނަގެ ގެޔަށް ދާށެވެ. އަހަރެން ކޮންމެވެސް އެއްގޮތަކަށް މިކަން ނިންމަން ބޭނުންވެއެވެ. ނަމަވެސް އެގެއަށް ދާން އަހަންނަށް ކެރޭނެ ހެއްޔެވެ. އޭނަގެ މަންމަ މެނަށްވެސް މިހާރު އަހަރެމެން އުޅެނީ ރުޅިވެގެން ކަން އެނގެއެވެ. ކޮންމެ ގޮތެއް ވިއަސް ވަރިހަމައެވެ.
އެކަނި މާ އެކަނި އަހަރެން ޓްރެއިން ސްޓޭޝަން ގައި މަޑުކޮށްލައިގެން ހުރީމެވެ. ހުމެއިދުގެ ގެއަށް ދާން އެއްގަޑިއިރު ވަންދެން ޓްރެއިން ގަ އިންނަށް ޖެހުނެވެ. އަހަރެންގެ އެއްވެސް ޝަކުވާއެއް ނެތެވެ. އަހަރެންގެ ހިތުގެ ތެޅުން އަވަސް ވާހެން ހީވިއެވެ. ކުއްލިގޮތަކަށް އަހަރެން ހުމެއިދުއާ ބައްދަލުކުރަން އެހާ ދުރަށް އެކަނި ދިއުމުން އޭނަ ހީކުރާނީ ކީކޭ ބާއެވެ.
އަހަންނަށް ހުމެއިދުގެ ގެއަށް ދާކަށް ނުކެރުނެވެ. އަހަރެން އެ ހިސާބަށް ދެވުމުން ހުމެއިދުއަށް ފޯނު ކުރީމެވެ. ފޯނު ނަގާނެ ކަމުގެ އެއްވެސް އުންމީދެއް ނެތިއެވެ. ނަމަވެސް ނަސީބު ރަނގަޅުކަމުން ހުމެއިދު ފޯނު ނެގިއެވެ. އަދި އަހަރެން ބައްދަލުކުރަން އައިސް ހުރިވާހަކަ ބުނުމުން މާބޮޑު ޝަކުވާއެއް ނެތި އަހަރެން ކައިރިއަށް އައެވެ.
އަހަރެންގެ ހިތުގެ އެދުންތައް އޭގެ އެންމެ ފުރިހަމަ ގޮތުގައި ހުމެއިދުއަކަށް ކިޔައެއް ނުދެވުނެވެ. އެއަށްވުރެ އަހަރެންގެ ހާލު މާދެރައެވެ. އެހެން ކަމުން އަހަންނަށް ޖެހުނީ ހުމެއިދު ދައްކަމުން ދިޔަ ދުނިޔަވީ ވާހަކަތައް އަޑުއަހަން އިންނާށެވެ. އޭނަ އަދިވެސް ބޭނުން ވަނީ އަހަރެމެން މީ ދެ ރަހުމަތްތެރިން ގޮތުގައި ތިބޭށެވެ. އޭގެ މާނައަކީ އަދިވެސް އޭނަ އަށް އަހަރެން ދެކެ ލޯބި ވާކަމަށް ގަބޫލުނުކުރެވެނީއެވެ. ނޫނީ ގަބޫލުކުރަން ބޭނުން ނުވަނީއެވެ. ކީއްވެ ހެއްޔެވެ؟ މިސުވާލުގެ ޖަވާބު ހޯދަން އުޅެ އުޅެ އަހަރެން ވަރުބަލިވެއްޖެއެވެ.
އެއްވެސް އުންމީދެއް ނެތް ދަތުރަކަށް ފަހު ހުސްއަތާ އަހަރެން ގެއަށް އައީ ރޮމުން ރޮމުން ނެވެ. އަހަރެން ބޭނުން ވަނީ ހުމެއިދުގެ ރަހުމަތްތެރިކަމެއް ނޫނެވެ. އޭނަގެ ތެދުވެރި ލޯތްބެވެ. އަހަރެމެން ދެމީހުން ދެކެމުން އައި ހުވަފެން ތަކުގަ ހަގީގީ ކުލަ ޖެހެން އަހަރެން ބޭނުންވެއެވެ.
އަޑިގަޑަކަށް ފަހު އުސްގަޑެއް އަންނާނޭ މުސްކުޅިން ބުނެ އުޅެއެވެ. އަހަރެން އުފާވެރި ދުވަސް ތަކަކަށް ފަހު ވެއްޓުނު މި އަޑިގަޑުން މިންޖުވާނީ ކޮންދުވަހަކުން ބާއޭ އަހަރެންގެ ހިތައް އަރައެވެ. އަހަންނަށް އުފަލެއް ލިބޭނީ ހުމެއިދުގެ ލޯބި އަހަންނަށް ލިބުނު ދުވަހަކުން ނެވެ.
އަހަރެން އަދިވެސް އުންމީދު ކަނޑައެއް ނުލަމެވެ. އަހަރެން ލިޔުނު ސިޓީ ހުމެއިދު އަށް ފޮނުވުމަށް ނިންމީމެވެ. އަދި އޭނަގެ ލޯތްބަށް އެދި އާދޭސް ކުރުމަށް ނިންމީމެވެ. އަހަރެން ބޭނުންވީ ހުމެއިދުގެ ބެސްޓް ފްރެންޑް މެދުވެރިކޮށް އެކަން ކުރުމަށެވެ. އެގޮތުން އަހަރެން އޭނަ އަށް ގުޅީމެވެ. ނަމަވެސް ކަންތައް ވެގެން ދިޔައީ އަހަރެން ހީކުރިގޮތާ މުޅިން ހިލާފަށެވެ. ހުމެއިދުގެ ބެސްޓް ފްރެންޑް ގެ ފަރާތުން އެނގުނު ގޮތުގައި ހުމެއިދު އަށް ވަނީ މިހާރު އެހެން ކުއްޖެއްދެކެ ލޯބި ވެވިފައެވެ. އެހެން ކަމުން އޭނަ ނަސޭހަތް ތެރިވީ ހުމެއިދުގެ ހަނދާން ތަކާ މަޑު މަޑުން ދުރަށް ދިއުމަށެވެ. އަހަރެންގެ ބަސް ހުއްޓުނެވެ. ހިނދުކޮޅަކަށް ނަމަވެސް އަހަރެންގެ ފުރާނަ އަހަރެންގެ ހަށިގަނޑާ ވަކިވި ހެން ހީވިއެވެ.
އަހަރެންގެ ހުރިހާ އުންމީދުތައް ފެނަށް ވީއެވެ. ހުމެއިދުގެ ލޯބި ހޯދަން މި ހުރިހާ ދުވަހު ކުރި މަސައްކަތުގެ ނަތީޖާ އަކީ ހުމެއިދުއަށް އެހެން ކުއްޖެއްދެކެ ލޯބި ވެވުން ހެއްޔެވެ. އަހަރެން އަމިއްލަ ނަފްސު ދެކެ ރުޅިއައެވެ. ނަމަވެސް މިއަދު އަހަންނަށް ކުރެވޭނެ އެއްވެސް ކަމެއް ނެތެވެ. ހުމެއިދު މަތިން ހަނދާން ނައްތާލުން ނޫން އެހެން ގޮތެއް ނެތެވެ. އަހަރެން ވިސްނާލީމެވެ. މި ހުރިހާ ދުވަހު އަހަރެން މި ވީ ގުރުބާނީ ތަކާ ކުރި ދުޢާ ތައް ބޭކާރުވެގެން ދިއުމަކީ ނާދިރު ކަމެކެވެ. ތަގުދީރުގައި ލިޔެވިފައިވާ އެއްޗެއް އަހަންނަކަށް ބަދަލެއް ނުކުރެވޭނެއެވެ. އެހެން ނަމަވެސް އަހަންނަށް މަސައްކަތް ކުރެވިއްޖެއެވެ.
އެތައް ދުވަހެއް ކަރުނައިގެ ތަންމަތީގައި ހޭދަކުރުމަށް ފަހު އަހަރެން ފުން ނޭވާއެއް ލީމެވެ. ވޭތުވެދިޔަ ހިތްދަތި ދުވަސްތައް ހަނދާން ނައްތާލުމަށް ފަހު އައު ހަޔާތެއް ފެށުމަށް އަޒުމް ކަނޑައެޅީމެވެ. އެތައް ދުވަހަކަށް ފަހު ރައްޓެހިންނާއި ޗެޓް ކޮށްލާ ހިއްވިއެވެ. އެގޮތުން ފުރަތަމައިނުން ވެސް ވަނީ "ފޭސްބުކް" އަށެވެ. އެތައް ބައިވަރު ފްރެންޑް ރިކްއެސްޓް ތަކާ މެސެޖް ތައް ހުއްޓެވެ. އަހަރެން އިންބޮކްސް ހުޅުވާލީމެވެ. ހުސްވެސް އަހުސަމްގެ މެސެޖް ތަކެވެ. އަހުސަމް އަކީ އެތައް ދުވަހެއް ކުރިން ސުރެ އަހަންނަށް ލޯބި ހުށައަޅަމުން އަންނަ ރަނގަޅު ކުއްޖެކެވެ. ހުމެއިދުއަށް ޓަކައި އަހަރެން އޭނަ އަށް އެއްވެސް ޖަވާބެއް ނުދީ އޭނަ އިގްނޯ ކޮށްލަނީއެވެ.
އަހަރެން އޭނައަށް ރިޕްލައި ކުރަން އުޅުނު ތަނާ ހުމެއިދުގެ ބެސްޓް ފްރެންޑް ވާހަކަ ދައްކަން ފެށިއެވެ. އަހަރެން ވެސް ވާހަކަ ދެއްކީމެވެ. ބޭއިޙުތިޔާރުގައި އަހަންނަށް ހުމެއިދުއާއި އޭނާގެ ލޯބިވެރިޔާ ކިހިނެއްތޯ އަހާލެވުނެވެ. ޖަވާބުގައި އޭނަ ބުނީ އެކަން ވާގޮތެއް ނުވި ކަމަށެވެ. ހުމެއިދު އަށް ލޯބި ވެވުނު ކުއްޖާ އުޅެނީ އެހެން ކުއްޖަކާ ރައްޓެހިވެގެން ކަމަށާ ހުމެއިދުއަށް އެކަން އެގުނީ މާ ފަހުން ކަމުގައި ބުންޏެވެ. އަހަންނަށް އިތުރަށް ކުރާނެ ސުވާލެއް ނޭނގުނެވެ. އެވަގުތު ކޮންމެވެސް އެހެން މީހަކު ވާހަކަދައްކަން ފެށިއެވެ. އަހަރެން ބަލާލީމެވެ. އެއީ އަހުސަމް އެވެ.
=ނިމުނީ=
A True Story
By, Abhal 27-06-2010
