ޑްރީމް ގާރލް..
ބެލްކަނީގައި ހުރި ޕޮޓެއްގައި އިންދާފަ ހުރި މިރުސްގަހަކަށް ބޭސް ޖަހަން އަހަރެން ވަރަށް ޝައުޤުވެރި ކަމާއެކު ހުރީމެވެ. ގަސް ހެއްދުމަކީ ހޮބީއެއްގެ ގޮތުން އަހަރެން ކޮށްއުޅޭ ކަމެކެވެ.
" އައިލަވްޔޫ ބޭބީ"، ފުރަގަހުން އައިސް އަހަރެންގެ ގައިގައި ބައްދާލަމުން އަހަރެންގެ އަންހެނުން މާޔާ ބުނެލިއެވެ. އަހަރެމެންގެ ކައިވެންޏަށް 22 އަހަރު ފުރުން އިރުވެސް މާޔާގެ އެ އާދަޔަށް އެއްވެސް ބަދަލެއް ނާދެއެވެ. އަހަންނަށް މާޔާ ލިބުނުކަން އެއީ އަހަރެންގެ ނަސީބެވެ.
އެވަގުތު އަހަރެމެންގެ ދޮށީ ދަރިފުޅު ޝަނާ ސްކޫލު ނިންމާފަ އައިސް ގެއަށް ވަނެވެ. މިއަހަރަކީ ޝަނާ އޯލެވެލް އިމްތިހާނުގައި ބައިވެރިވާ އަހަރެވެ.
"ބައްޕަ އަޅުގަނޑަށް ވަރަށް ބޮޑު ކަމެއް ކޮށްދެން ވެއްޖެ!"
އަހަރެން ފެނުމާއި އެކު ޝަނާ އަދަބުވެރިކަމާއި އެކު އެދުނެވެ. ކޮންކަމެއް ތޯ ސުވާލުކުރުމުން، ސްކޫލު ގަ އޮންނަ ކުރުވާހަކަ ލިޔުމުގެ މުބާރާތަކަށް ވާހަކައެއް ލިޔެދިނުމަށް އެދުނެވެ. އަހަރެން ހައިރާން ކަމާއި އެކު ޝަނާ އަށް ބަލައިލީމެވެ. އަދި އަހަރެން ވާހަކަ ލިޔާކަމެއް އެނގެނީ ކިހިނެއްތޯ ސުވާލު ކުރީމެވެ. އެވަގުތު ޝަނާ ބަލައިލީ މާޔާ ގެ މޫނަށެވެ.
ޝަނާގެ އެ އެދުމަށް އަހަރެން އާނއެކޭ ބުނީމެވެ. ނަމަވެސް ވާހަކައެއް ލިޔުމުގެ ބަދަލުގައި މީގެ 22 އަހަރު ކުރިން އަހަރެން ލިޔުނު ޑައިރީ ފޮތެއް ނެގީމެވެ. އޭގައި އަހަރެން ލިޔެފައިވާ އެތައް ވާހަކަ ތަކެއް ހުރީމައެވެ. ފޮތުގެ އެކި ޞަފްޙާތަކަށް އަހަރެން ނަޒަރެއް ހިންގާލީމެވެ. އަހަރެންގެ ނަޒަރު އަމާޒުވީ އަހަރެން ލިޔުނު އެންމެ ފަހު ވާހަކަ އަށެވެ....
-----------------------
އެއީ އަހަރެން އޭލެވެލް ގެ އެންމެ ފަހު ސިމެސްޓަރ ގައި ކިޔަވަމުން ދިޔަ ދުވަސް ވަރެވެ. ސްކޫލުގެ އަދަބީ ޖަމިއްޔާގައި އަހަރެން އިސް މަގާމެއް އަދާކުރީމެވެ. އަހަންނާ އެންމެ ކައިރިން މަސައްކަތްކުރާ ޝަނާ އާއި ދޭތެރޭ ހާއްސަ ނަޒަރަކުން ބެލެންފެށީ މިދުވަސް ވަރުއެވެ. ޝަނާ ފެންނަ ކޮންމެ ފަހަރަކު އޭނަޔާ ދިމާލަށް ބަލަހައްޓައިގެން އިންނަން އަހަރެންގެ ހިތް މަޖުބޫރު ކުރުވައެވެ. ނުހަނު ރީތި ސޫރަ އެކެވެ. ހެދިހެދި ހުރި އިސްކޮޅެކެވެ. ސްކޫލް ޔުނިފޯމް ގައި ހުންނަ އިރު އަދި ވަކިން ރީތިހެން ހީވެއެވެ. އެ ރީތި އިހި ކަނދުރާގައި ބީހިލުމުގެ ނަސީބު ލިބޭނެ ނަމައޭ ހިތަށް އަރައެވެ.
ބައެއް ފަހަރަށް އަހަންނަށް އޭނަ ފެނުމުން ރަކިވާ ގޮތް ވެއެވެ. އަހަރެން އޭނަ އަށް ބަލާ ކަން އޭނަ އަށް އެނގޭހެން ހީވާތީއެވެ. އެހެންވެ އަހަންނަށް އޭނަޔާ ވާހަކަދައްކަންވެސް ކެރެނީ ވަރަށް މަދު ފަހަރަކުއެވެ.
ނަމަވެސް ހިތާ ހިތުން އަހަންނަށް އޭނަ ދެކެ ލޯބި ވެވުނެވެ. އެހެން ނަމަވެސް ފާޅުގައި ކުރިމަތިލާނެހާ ހިތްވަރެއް އަހަރެންގެ މި ބަލި ހިތަކަށް ނުލިބުނެވެ. އަބަދުވެސް އަހަރެންގެ ދެލޮލުގެ ކުރިމަތީގައި އެ ރީތި ސޫރަ ހުންނަހެން ހީވެއެވެ. ދެލޯމަރާލާ ކޮންމެ ހިނދުކޮޅަކުވެސް އަހަންނަށް އެ މޫނު ފެންނަހެން ހީވެއެވެ.
މިގޮތުގައި ދުވަސްްތައް ވޭތުވަމުން ދިޔައެވެ. އަހަރެންގެ ކިޔެވުން ވެސް ނިމުނީއެވެ. ޝަނާ އަކީ ހަމައެކަނި އަހަރެންގެ ހުވަފެނީ މަންޒިލެކެވެ. އަހަރެން މިދެކޭ ހުވަފެނުގައި އެއްވެސް ކުލައެއް ނުޖެހެއެވެ.
އެރެއަކީ ސްކޫލުގެ އަހަރީ އިނާމު ދިނުމުގެ ޖަލްސާ އޮތް ރެއެވެ. އަހަރެން އެ ޖަލްސާ އަށް ދިޔައީ އަހަރެންގެ ކޮށްކޮ ގޮވައިގެންނެވެ. އަހަރެމެންގެ ކަނާތްފަރާތު ބަރީ ގައި ހުރި ގޮނޑިއެއްގައި ޝަނާ ވެސް އިނެވެ. އިރު އިރު ކޮޅުން އަހަންނަށް އޭނަގެ މޫނަށް ބަލައިލެވެއެވެ. ބައެއްފަހަރު އޭނަވެސް އަހަންނަށް ބަލާލާފަ ހިނިތުން ވެލައެވެ.
ޖަލްސާ ނިމުމުން އެންމެންވެސް ސްކޫލު ގޯތިތެރެއަށް ނިކުތެވެ. އެތާ އޮތް ރިފްރެސްމެންޓެއް ގައި އަހަރެންވެސް ބައިވެރިވީމެވެ. އިރުކޮޅަކުން ޝަނާ އަހަރެންގެ ކައިރިއަށް އައެވެ. އަހަރެންގެ މުޅި ހަށިގަނޑު ފިނިވި އެވެ. އޭނަގެ އަތުގައި އޮތް ކެމެރާއެއް ދިއްކޮށްލުމަށް ފަހު އޭނަ އާއި އަހަރެންގެ ކޮށްކޮގެ ފޮޓޯއެއް ނަގައިދިނުމަށް އެދުނެވެ. އަހަރެން ވެސް ޝަނާ އާއިއެކު ފޮޓޯއެއް ނަގަން ވަރަށް ބޭނުންވިއެވެ. އެހެންނަމަވެސް އަހަންނަކަށް އެކަން ކުރާނެހާ ހިތްވަރެއް ނުލިބުނެވެ.
އަހަރެން އަހަރެންގެ އަމިއްލަނަފްޞަށް މަލާމަތް ކުރީމެވެ. އަހަރެންގެ ތެޅި ތެޅި އޮތް ހިތަށް އެއްވެސް ފަރުވާއެއް ނުދެވޭތީ އެވެ. އަހަރެންގެ މުޅި ޙަޔާތުގައި ލޯބީގެ ނަޒަރަކުން އެންމެ ފުރަތަމަ ބެލެން ފެށުނުނީ ޝަނާގެ އެ ރީތި ސޫރަޔަށެވެ. އެހެންނަމަވެސް އަހަރެންގެ މި ލޯތްބަކީ ހަމައެކަނި އަހަރެން ދެކޭ ހުވަފެނެކެވެ. ދުވަހަކުވެސް ޝަނާގެ ކުރިމަތީގައި އަހަރެންގެ ހިތުގެ އެދުން ހާމަކުރާކަށެއް އަހަންނަކަށް ނުކެރޭނެއެވެ. ސަބަބަކީ އޭނަގެ ދުލުން ނޫނެކޭ ބުނެފިނަމަ އެކަން އަހަންނަށް ހަޖަމު ނުކުރެވޭނެތީ އެވެ.
އެހެންކަމުން އަހަރެން ގަސްތުކުރީ އެ ހިޔާލުތަކާ ކޮންމެވެސް ވަރަކަށް ދުރަށް ޖެހިލާށެވެ. ނަމަވެސް ކޮންމެ ރެއެއްގެ ހުވަފެނުން އަހަންނަށް އޭނަ ފެނެއެވެ.
އަހަރެން ރަށުން ރަނގަޅު ވަޒީފާއެއް ހޯދީމެވެ. އަދި މަޑުމަޑުން ޒިންމާދާރު މީހަކަށް ވެވޭތޯ މަސައްކަތް ކުރީމެވެ.
އާދައިގެ މަތިން އަހަރެން އޮފީހަށް ދާން ގެއިން ނިކުތީމެވެ. ތުއްތު ކުއްޖަކު ގޮވައިގެން މަގުމަތީގައި ކުޅެން ހުރި އަންހެން ކުއްޖަކު ފެނިފައި އަހަންނަށް ހުއްޓެވުނެވެ. އިސްކޮޅުން ދިގު ރީތި ކުއްޖެކެވެ. މީގެ ކުރިން އަހަރެން އޭނަ ނުދެކެމެ. ނުވަތަ ފާހަނގަ ކުރެވިފަކަ ނެތެވެ. އަހަރެން ފެނުމުން އޭނަ ލަދުރަކި ގޮތަކަށް ހިނިތުން ވެލިއެވެ.
އަހަރެން ވެސް ހީލީމެވެ. އެއަށް ފަހު އޮފީހަށް ދިއުމަށްޓަކައި ހިނގައިގަތީމެވެ. ދެންެއަހަންނަށް ފެނުނީ އަހަރެންގެ ހިތަށް ކުދިކުދި ކަށިތަކެއް ހެރިގެން ދިޔަ ފަދަ މަންޒަރެކެވެ. އަހަރެންގެ ކުރިމަތިން ވިއްސަކަށް ފޫޓު ދުރުން ޝަނާ ކޮންމެވެސް ފިރިހެން ކުއްޖަކާ އެކީ އަންނަ މަންޒަރެވެ. ދެމީހުން ހިނގާފަ އައީ ވަރަށް ގައިގޯޅި ގޮތަކަށެވެ. އެކަކުއަނެކަކަށް ބަލަމުން ހީ ސަމާސާ ކުރަމުންނެވެ. ޝަނާ އަހަންނާ އަރާހަމަވުމުން ވެސް އަހަރެން ފެނުނު ކަމަށްވެސް ނަހަދައެވެ. އަހަރެންގެ ހިތަށް ވަރަށް ތަދުވިއެވެ. އަހަރެން ދެކެމުން އައި ފޮނި ހުވަފެންތައް ވިއްސި ވިހާލިވެގެން ދިޔައީ ކަމުގައި ގަބޫލުކުރެވުނެވެ. އަހަރެން ކިތަންމެ ދެރަވި ނަމަވެސް އަހަރެންގެ މޫނުމަތިން އެކަން ފާޅުނުކޮށްވޭތޯ އަހަރެން ބެލީމެވެ.
އޭގެ އަނެއް ދުވަހެވެ. ހިތްމަރުވެފައިވާ ބަލިމީހެއް ފަދައިން މަޑު މަޑު ހިނގުމެއްގައި އޮފީހަށް ދާން އަހަރެން ގެއިން ނިކުތީމެވެ. މިއަދުވެސް އަހަރެންގެ ނަޒަރު ގޮސް ހުއްޓުނީ ކުރިންދުވަހު ފެނުނު ކުއްޖާ އަށެވެ. ހަމަ އޭނަ އެވެ. ހަމަ އެ ކުޑަކުއްޖާ ގޮވައިގެން މަގުމަތީގައި ކުޅެން ހުރީއެވެ. ކުރިން ދުވަހެކޭ އެއްގޮތަށް މިއަދުވެސް އޭނަ އަހަރެން ފެނިފަ ލަދުރަކި ގޮތަކަށް ހިނިތުން ވެލިއެވެ. ނަމަވެސް އަހަރެންގެ ގައިގައި ރައްދުގައި ހިނިތުން ވެލާނެހާ ހިތްވަރެއްވެސް ނެތެވެ. އަހަރެން ދިޔަ ގޮތަށް ގޮސް ދިޔައީ އަހަރެން ވަޒީފާ އަދާކުރާ އޮފީހަށެވެ.
އަހަރެން އޮފީހުގައި އިންދަ ކޮންމެވެސް ނުދަންނަ ނަންބަރަކުން ފޯނެއް އައެވެ. އަހަރެން ފޯނު ނަގައި "ހަލޯ" އޭ ބުނެލީމެވެ. ރައްދުގައި ވާހަކަ ދެއްކީ ކޮންމެވެސް އަންހެންކުއްޖެކެވެ.
އަހަރެން ކޮން ކުއްޖެއްތޯ ސުވާލުކުރީމެވެ.
" އަހަންނަށް ކިޔަނީ މާޔާ، މިއަދު ހާދަ ދެރަވެފަ ހުރި ދުވަހެއް ހެން ހީވޭ! އަނެއްކާ.."
އަހަރެން ހުރީ ބުނާނެ އެއްޗެއް ނޭނގިފައެވެ. އޭނަގެ ވާހަކައިން އަހަންނަށް އެއީ ކޮން ކުއްޖެއްކަން އެނގުނެވެ.
"އަނެއްކާ އަހަރެން މިގޮތަށް ގުޅައިގެން ވާހަކަ ދެއްކުން މީ އަހަން ނަށް ކުރެވޭ ކުށެއްތަ؟"
އަހަރެން އެއްޗެކޭ ނުބުނުމުން ވަރަށް އިހުތިރާމާއި އެކު މާޔާ ސުވާލު ކުރިއެވެ. ޖަވާބުގައި އަހަރެން ނޫނެކޭ ބުނީމެވެ. އަދި އަހަރެންގެ ފޯނު ނަންބަރު ހޯދީ ކިހިނެއްތޯ ސުވާލުކުރީމެވެ. މާޔާ ބުނި ގޮތުގަ އަހަރެންގެ ނަންބަރު ލިބުނީ އޭނަގެ، އަދި އަހަރެންގެ ވެސް ގާތް ރަހުމަތްތެރިއެއްގެ ފަރާތުން ކަމަށެވެ.
އެދުވަހަށްފަހު އަހަރެމެން ދެމީހުން ކޮންމެ ދުވަހަކުވެސް ފޯނުން ވާހަކަ ދައްކަމެވެ. އެކަކު އަނެކެއްގެ ވާހަކަތައް ހިތްސާ ކުރަމުން ދުވަހަކަށް ވުރެ ދުވަހެއް އަހަރެމެންގެ ގުޅުން ބަދަހިވަމުން ދިޔައެވެ. އަދި އަހަރެމެންގެ މި ގުޅުން އެންމެފަހުން ލޯތްބަށް ބަދަލުވެގެން ދިޔައެވެ. އަހަރެންގެ ހިތުގައި މާޔާ އަށް ވަރަށް ހާއްސަ މަގާމެއް ދެވުނެވެ. ދެމީހުންގެ މި ލޯބީގެ ގުޅުން އެންމެފަހުން މުޅި ރަށަށް ވެސް އާންމުވެގެން ހިނގައްޖެއެވެ.
އެއްދުވަހެއްގެ ހަވީރެވެ. އޮފީސް ނިންމާލާފަ ގެއަށް އައިސް އަހަރެން އުޅުނީ މިރުސްގަސްތަކަށް ފެންދޭށެވެ. އެވަގުތު ކޮންމެވެސް އަންހެން ކުއްޖަކު އައިސް ސަލާމް ގޮވާލިއެވެ. އަހަރެން ސަލާމް ބަލައި ގަތީމެވެ. ދެން އެކުއްޖަކު އައިސް އަހަރެންގެ އަތަށް ކުޑަ ފޮތެއް ދިއްކޮށްލުމަށް ފަހު އެއްވެސް އެއްޗެއް ނުބުނެ އެނބުރި ދިޔައީއެވެ.
އަހަރެން ވަރަށް ހައިރާންވެ ހުރެ އެ ފޮތް ހުޅުވާލީމެވެ. ފޮތުގެ ފުރަތަމަ ޞަފްހާގައި ވަރަށް ފަނޑު ފަނޑު އަކުރަކުން ލިޔެފަ އޮތީ،
" އަހަރެން ހުޝާމް ދެކެ ވަރަށް ލޯބިވޭ"
އަހަރެން ހިނިތުން ވެލީމެވެ. މިއީ މާޔާގެ ކަމެއް ކަން އަހަންނަށް އެނގޭތީ އެވެ.
"އަހަރެން ހުޝާމް ދެކެ ވަރަށް ލޯބި ވޭ. އަދި ހުޝާމު ވެސް އަހަރެންދެކެ ލޯބި ވާކަން އަހަން ނަށް އެނގޭ!"
އަހަންނަށް މިކަން ވަރަށް މަޖާ ކަމަކަށް ވިއެވެ. އެއަށް ފަހު ޖެހިގެން އިން ގަނޑު އެއްލީމެވެ.
" އަހަރެން މިއޮއްހާ ދުވަހު މި އިންތިޒާރު ކުރީ ހުޝާމުގެ ދުލުން މި ފޮނި ފޮނި ބަސްތައް އިވޭނެ ދުވަހަކަށެވެ. ނަމަވެސް..."
އަހަރެން ކުޑަކޮށް ހާސްވާ ގޮތްވިއެވެ. ދެއަތް ތުރުތުރުއަޅާ ހާލު ޖެހިގެން އިން ގަނޑު އެއްލީމެވެ.
"...ނަމަވެސް މިއަދު ހުޝާމް ތި ވަނީ އެހެން މީހެއްދެކެ ލޯބި ވެފައެވެ. ކީއްވެ ހެއްޔެވެ؟ އަހަރެން އަބަދުވެސް ހީކޮށްގެން ހުރީ، ޝަނާ ނޫން މީހަކަށް ހުޝާމު ލޯބި ހުށަނާޅާނެ ކަމަށެވެ. ނަމަވެސް މިހާރު ވަގުތު ފާއިތު ވެއްޖެއެވެ. އަހަރެންގެ ހުރިހާ ހުވަފެންތައް ފުނޑު ފުނޑުވެގެން ދިޔައީ އެވެ.... ޝަނާގެ ފުށުން އެއްވެސް ކުށެއް ފެނިފައި ވާނަމަ ޝަނާ އަށް މާފުކޮށްދޭނެ ކަމަށް ހީކުރަމެވެ.
އަހަރެންގެ ދެލޯ ފެންކަޅިވެގެން ދިޔައެވެ. އަހަންނަށް މިވީ ކީއް ހެއްޔެވެ؟ އަހަންނަށް ރޯންފެށުނެވެ. މުޅިމީހާ ތުރުތުރު އަޅަން ފެށިއެވެ.
އިރުކޮޅަކުން އަހަރެންގެ ފޯނު ރިންގު ވާން ފެށިއެވެ. ކޮންމެވެސް ނުދަންނަ ނަންބަރެކެވެ. އަހަރެން އަވަސް އަވަހަށް ފޯނު ނެގީމެވެ. ރޮވިފަ ހުރި ކަހަލަ ގޮތަކަށް ކޮންމެވެސް އަންހެނަކު ވާހަކަ ދެއްކިއެވެ.
" ދަތިކަމަކަށް ނުވަންޏަ ވަރަށް އަވަހަށް ހޮސްޕިޓަލަށް އައިސްދީފާނަން ތަ؟"
އަހަރެން އާނއެކޭ ބުނުމުން އެ އަންހެންމީހާ ފޯނު ބޭއްވިއެވެ. އަހަންނަށް ވީގޮތް ބުނެދޭންވެސް ނޭނގުނެވެ. ހަތަރުއުދަރެސް ފެނުޖެހުނު ކަހަލައެވެ. އަވަސް އަވަހަށް އަހަރެން ދުއްވައި ގަތީމެވެ.
ހޮސްޕިޓަލާ ހަމައަށް ދެވުނު އިރު އަހަރެން ހުރީ ވަރުބަލިވެފައެވެ. އެވަގުތު އަހަރެންގެ ކުރިމައްޗަށް ހުއްޓުނީ ޝަނާ އާއި އެކީ މީގެ ކުޑަދުވަސްކޮޅެއް ކުރިން ފެނުނު ފިރިހެން ކުއްޖާއެވެ. އަހަރެން ފެނުމާއި އެކު އޭނަ އަވަސް އަވަހަށް އަހަރެންގެ އަތުގަ ހިފާ ދަމާފަ ކަހަލަ ގޮތަކަށް ގެންދިޔައެވެ. އަދި އޭނަގެ ކޮށްކޮ ސަލާމަތް ކޮށްދޭށޭ ބުނެ އަހަރެން އެމެޖެންސީ ވާރޑް ތެރެއަށް ވެއްދި އެވެ. އެވަގުތު އަހަންނަށް ޝަނާ އޮކްސިޖަން ގުޅާފަ އޮއްވަ ފެނުނެވެ. އަހަންނަށް ޝަނާ އެއޮތް ހާލު ފެނިފައި ރޯންފެށުނެވެ. ބަލި އަޑަކުން "ހުޝާމް، ހުޝާމް" ކިޔާފަ އޭނަ އެގޮވަނީ އަހަންނަށެވެ. އަހަރެން ފެނުމާއި އެކު ޝަނާ ހިނިތުން ވެލިއެވެ. އެއަށް ފަހު ބާރު ބާރަށް ނޭވާލާން ފެއްޓިއެވެ. އަދި ހިނދުކޮޅެއްގެ ތެރޭގައި މިދުނިޔެއާ އަބަދުގެެ އަބަދަށް އަލްވަދާއު ކިއެވެ. އަހަންނަށް ވީގޮތް ބުނެދެން ވެސް ނޭނގުނެވެ. ހިފެހެއްޓުމެއް ނެތި ދެލޮލުން ކަރުނަ އޮހޮރިގެން ދިޔަ އެވެ..
--------------------------
" އައިލަވްޔޫ ބޭބީ"، ފުރަގަހުން އައިސް އަހަރެންގެ ގައިގައި ބައްދާލަމުން އަހަރެންގެ އަންހެނުން މާޔާ ބުނެލިއެވެ. އެވަގުތު މާޔާ އަށް އަހަރެންގެ ދެލޮލުން ފައިބަމުން ދިޔަ ކަރުނަ ތައް ފެނުނެވެ. މާޔާ ވަރަށް ހާސްވެފަ ހުރެ ވީ ކިހިނެއްތޯ އެހިއެވެ. އެވަގުތު އަހަރެމެންގެ ދަރިފުޅު ޝަނާ ވެސް އެތަނަށް އައެވެ.
އަހަރެންގެ އަތުގައިއޮތް ޑައިރީ ފޮތް މާޔާ އަތަށް ދިއްކޮށްލީމެވެ. އެއަށް ފަހު އަަހަރެމެންގެ ދަރިފުޅު ޝަނާ އާއި ދިމާއަށް ބަލަހައްޓައިގެން ހުރެވުނެވެ.
=ނިމުނީ=
By, abhal 01-09-09
No comments:
Post a Comment